بدري صحيت من نومي

من ستة بقوم من نومي  !!!!

طبعا الخلاني ارجع سريع للكتابة في المدونة هو الاستفذاااااذ اليومي من واحدة من شركات الاتصالات عاملة ليها دعاية غريبة وعجيبة
  الدعاية فيها اقتباس لي اغنية بتاعت اطفال قديمة اكيد اي واحد في جيل اخر التمنينات وبداية التسعينات  المهم عشان ما اطول عليكم الدعاية بتصور حال الشاب السوداني بي طريقة مبتزلة جدا بايخة كدا ......
           القصة بتبدا مع الصباح ماشا عسل حلاووووة زي مابقول منزر الاخدر صاحبي يعني الواحد يوقم من الصباح امورو واضحة امشي الشغل بالعربية الفارهة استغفر الله العظيم ويمشي المكتب والكلام دا لي اي زول شايل شريحة ار.............. ؛ ويرجع الاقي مرتو واولادو مستنينو في الفيلا والامور واضحة لاشافع مفلوق ولا المرا صارة بوزا .... وبرضو الدعاية مستمرة .
.................................................
  طيب هل ممكن يعني يكون الزول السوداني يومو كدا ولا دا مازول ولا زول  و ماسوداني سؤال يعني ؟؟
حاجة تانية دا استفزاز لي مشاعرنا ورفض داخلي للواقع ببدا ينتح نتح شديد في جوا اي شاب دوساني ولا كيف ؟؟؟
الظريفة قبل يومين في الاستاد شاهدت اغرب ظاهرة في العالم ظاهرة اخر عربية كريز في العالم شوفو الصدفة الغريبة دي فجاءة والناس في الاستاد مسنين اي حاجة توديهم الكلاكلة بمشتقاتهتا ( لفة - صنقعت - دنقرت .......) جات من الافق البعيد كريز ياااالا عظمة السماء كريز عدييييييييييييل كدا لكن للاسف قبل ماتصلنا بي تلتين متر خطفوها الاوغاد واتملت وكانت دي اخر كريز تاني عينك لابتشوف افق ولا شي من زحمة الناس ناس ناس بس الموقف عبارة عن ناس ارحمنا يارب الناااااااس ...
              وبدري صحيت من نومي ....... مشيت علي امي وابوي صبحت

سجنتها يا مان فكها عشان تمشي وتجيك .........................

                                 ودمتم 

                                                                                                                                   ساكس 

الهلال والترجي (سرجي مرجي انت حكيم ولا ترجي )

رصاصة الرحمة اصابت كل مشجعي الهلال السوداني بعد الهزيمة المستحقة التي اوجعتنا (والله )  .
 طيب نتكلم بالبلدي الكورة مارجالة ساي ولا بالجرايد لكن احتراف وكورة ولعب وفنيات يعني اي زول ما عندو علاقة بالحاجات دي مافي داعي لي انحنا وانحنا مسطبة .
بالنسبة للترجي اتلوم لوووووووووووووم شديد يعني مفروض كان يمروقو ليهو بي خمسة ستة لزوم يختوها بينهم وبين الفقر ممكن سادومبا تجيهو تجليات فجعا .
 المهم ما علينا راجين كورة رادس ونشوف الهدهد الظهر في الاستداد قصتو شنو يعني بمرق الناس ديل ولا الحنك شنو
           سجارة قوية تكفي مية
                                دايمة يايمة 

حلة العزابة مقتبس

ياجماعة الخير العزابة ديل شقين حال الواحد تساله من بيت
ناس فلان وهو جنبوا يقول ليك شايف بيت العزابة داك امشى
وتعال راجع تلقى الباب يمينك يعنى لازم يوريك بيت العزابه
والسماسرة أكان دايرين يؤجروا البيت لعذابه يحلف يقول ليك
ديل أولاد ناس غايتو قصتم طويلة
والعزابه أنواع فى نوع العناقريب و لحافاتم طول السنة فى الحوش
وانت داخل من الحوش تقابلك الحلة والجردل وشراب المويه من الزيرباأى ماعون قريب ليك وغايتو النعلات التقول فى صلاة جماعه
والجرايد بعد القرايه للحريق لزوم الحله ودخان الكانون فى السماء
وهى معروفة القطر قام والبلاعه ملاينه مويه وكل يوم فيها شكله الأستحم منو مابتعرفوا إلى يكون جنية
والحيطان كلها تزكار من وهاك ياصور ممثلات لعيبة كوره وفرش الاسنان بفرزوها كيف ماعارف 

حنك لولبي كدا

الراندوك يا احبائي
كلمات ومعانيها
فرده= صديق أو رفيق.
ضفادع+نحل+دبايب= شخص يفرض نفسه ويتواجد فى كل مكان.
مرطّب= مرتاح أو بحاله ممتازه.
ربه=حفله.
دكاكينيه= خاصه.
جكس+حسس+دامة= بنات.
ياعمك= ياأخونا.
كهارب+حنه+كشكوش+شرتيت= فلوس ونقود.
هكر+شجر+طاعن في السن= زول قديم.
قلب= أنسان عزيز.
شتت+تلاشى= ذهب أوغاب.
شاكوش=عندما يقابل شخص بالصد والرفض خصوصا من فتاه.
شديد+دسيس+مكسب= أمرجميل رايع.
فك المجنونه= خمّس أو فك السيجاره.
تفاتيح+شرمه= الشخص الذى يدعى معرفته بالامور.
هوى= شى لاتحمد عقباه.
القسم+القرد+غرز= أسماء لرقصات شبابيه.
قائد الاسطول= مسطول.
ورل= اكبردرجه من(دبيب ونحل وضفادع)موضح أعلاه.
سحليه= البنت التى تفرط من أستخدام مستحضرات تفتيح البشره.
عشمانا+غدمبليه+سفاسف+شومة=للاكل .

مهوى= جائع.
كبايه+كبكبي= أنسان يتوتر بتعامله مع الجنس اللطيف.
لغم= أنسان صاحب تخريب وتدمير.
تبشه= شخص(عوير).
مسطح= شخص لم يفهم الموضوع..
والبطاريق مصطلح بتاع واحد صحبي كدا
اول مصطلح هو الجلك والجلكينة وهو يعني الاب والام، والتفتيحة هو الرجل الفاهم والواعي، يعرف كيف يكب (المكنات والجاكات) اي يكذب (ويحنك الفارات) اي يخدع ويغش المغفلين.. و(الجكس) هى المحبوبة..
والشتات يا فردة يعني نحن مشينا يا صديق او جرينا يا معلم نفس المعنى، والجوكي هو سواق الركشة..
اما الشمار فيعني النميمة والشاكوش يعني رفضا للمحبوب، وخمس لي اي اعطني شئ بسيط، وقال الشاعر يفكوك عكس الهواء اي يرفضوك ،
والقدة هو مثل لشخص كثير الكلام يقولوا فلان قدة ولصقة وصمغ، ويقولوا فلانة شرط للارض او شدة وغسيل عدة اى فتاة جميلة جداً.. وفلان كج وعارض اى رجل يجلب الحظ السيئ،
وفلان بلفان ومقحط، اي شخص بلا نقود. والفلوس هى الشرتيت أو الفلة أو الكنجالات او الضحاكات او التشديرة، وكلها تعني القروش.
ويقولو فلان دا حمام اي زول ضعيف الشخصية، عكسها فلان دا اصلي ومعلم وراسطا وكده(ما انت يا سيف ههه).. تعني زول قوي جداً
والجقلبة والبجبجة والحتحتة كلها أنواع من رقصات الحفلات، وفلان صبن الكيس تعني دساه

وفلان دقس واتلحس، اى خدعوه واكلوا حقوا.. وفلان عمل وهمة في شكل قلبة اى فلان اخترع شيئاً جديداً غير مألوف..
وفلان مستنكح اى زول يغش الناس. والقطع الناشف تعني الرفض والممانعة. وعصلج تعني رفض الامتثال. وفلان عملوا ليه شرحبيل اى شروه،
وعملوا منه زغبير، اى زاغوا منو. والبلف تعني الكمساري. وكلمة دامة تطلق على المرأة او الجكسوية . والمرأة تسمى عندهم الحنان والحاجة والبتاعة..
وفلان هرشناه وكحلناه عروض، اى خوفناه وارهبناه. وجضم الشئ اى اجاده واتقنه، والفطور عندنا اب دقن والعشاء هو عشمانة.. والحفلة هى طربانة
وجرَّ نور أى نظر لمدة طويلة. زول ما ناقش مسطح أي اهبل. وفلان مجنتر او فاطي سطر تعني ليس في كامل قواه العقلية. والصعوط هو الموبايل، وفلان متكل في ترطيبة متشرشح أى مرتاح.
وفلان كسح وفتح وقد سلك رقد صوف، تعني كلها الهروب، والشماسة هم الشرامة
نقلا عن كولا
حبه,حبذا:بمعنى فردة (موضح أعلاه
جامد:بمعنى شديد(موضح أيضا
مكسر:معجب
بكسر في التلج :بحنك أي يتكلم كلاما معسولا
برااي:كثير الكلام و قد يقال فلان وصلنا الاستيكة أي أكثر علينا الحديث...جدااا
شخت لفلان شخيت عريض:أي طنشه و يقال أيضا شخت ليه بالشيني
رامي طعمتو في زيتنا أو رامي طعمتو :أي رامي أذنه معانا أي (يتصنت

ماشه باسطه :في احسن حال
في السلك: يعني100% أي تمام
الملح :المجان
ضب , حفار:مصطلحات جامعية تعني الأشخاص الذين (يأكلون الكتب أكلا)...قراايين
ونسو = غشاهو
مسكو الحيطه = ورطو
الحديده = العربيه
باحصي = صاحبي
اعمل بردان , اعمل رايح , اعمل ميت = طنش
كتمت = حر , فلس , امتحانات ... كلو ماشي
ناس الطاره = العساكر
عمل يعععع = زاغ او جرى
دوكو = تظليل (يحليل ايامو) ههه
جلك = عمك كبير
قرن = ضابط او مسؤول.. حاجتين كدا
هواويس = دكاترة امتياز
مكتس = عيان حالتو صعبه
الشمار :خبر جديد لنج (طاااااااااازه)
حمر له:نظر له بعين يتطاير الشرر منها
خستكه:تكلم كلاما ليس له فائده وغير مفهوم
الزول ده طيارتو قامت :بمعنى موضوعو باظ وربما سوف يتحمل عواقب وخيمه
طيااااره ،قاطعه مويه ونور بمعنى : هى البنت الفائقة الجمال
الشره:هو انتظار الجكسويه وتقوم ماتجى

يوم قسموك ياهم

ياجماعه الله القذافي دا كان نصيح انا الحس المكوة علي بالطلاق ماشديد الزول دا شكلو راكب الفيل وانا قصة الكتاب الاخدر دي اصلو ماراكبة لي في راسي .

    الخوف فلان يقلدو ونحنا نروح فيها طبعا الراجل دا عندو مشكلة في داخلو امبارح بحضر في الخطاب بتاعو شكيت في نفسي وسالت رامي قلت ليهو انت الزبادي الشربناهو دا مر  ( حامض )ولا القصة  شنو الزول دا بهضرب هضربة شديدة وحااااااااات  الله ما شديد .
         والتسوي كريت في القرضة تلقاهو في ضهرا ويوم ليك ويوم ورا  يوم معمر القذافي ما جالي نوم ... الممحني في دا كلو انو وزير الداخلية الليبي خشا الغابة وقال مابلزمو .
سؤال لولبي  القصة دي حدها وين ( تونس / مصر / ليبيا / البحرين / اليمن / .......)؟؟ الشي العجيب  انو المريخ محل مايعسكر القيامة تقوم ههههههه شكيتك واشتكيت يا البدري .
         
           الرحلة طويلة طويلة طويلة

       تاني انا ما داير معاكم ....  فكوها خلوها تمشي تجيكم تجيكم الكشة .
                                                         ودمتم (ساكس)

اول اصطباحة

الي كل من يعرف يوسف ساكس انا داير اعمل حركة في شكل مدونة انشاء الله تكون موفقة واهلنا قالو القحة ولا صمة الخشم وانا قلت اقحقحق شوية لانو ما قاعدين نلقى فرصة نقح في اي حتة وداير اي زول يديني رايو طبعا.
اول اصطباحة مفروض ماح يكون فيها كلام كتير بس انا ح اتكلم في اي حاجة في الكورة في السياسة والسياسة فيها البركة والبركة فينا وفيكم كان في زول نفع في بلدنا دي لانو اساسا مافي اي امل كدا في شي والشباب بقي كلو همو في تلاتة حاجات اساسية ( سجارة البنقو ؛ الجكسوية وذي ما قال عفيف الزنبوق ؛ والرصيد بتاع الخدمة عشان يحنك مع المرا ) .
البلد دي حاكمها منو ما اناماعارف وبعدين الونسة بقت كلها مشينا دودي وهاني ثبت فلانة وفلانة عملت سهرة مبالغه و...... وحاجات كدا .
اليوم الفكرنا فيهو نطلع الشارع لقيت الناس ملمومة في ميدان جاكسون كم وخمسين واحد فرحت قلت بعد كدا ح يجبونا في الجزيرة وح اشتهر يامعلم خمسة دقايق كدا الامور جاااااطت ولقيت روحي انا وحمدي وعمرو وبتاع التسالي المهم اتخارجنا وانا عملت فيها حردان .
اها قايتو انا كل يومين تلاتة حا اجي ناطي ليكم بي كلام العجبو يقراهو ويكتب رايو والماعجبو عليكم الله ماينبزني لانو يادوب انا بادي والعفو في العافية ؛ اموت و اعرف القذافي طلع مع شعبو عشان يسقطو النظام الليبي ليه .
فك الاصطباحة عشان تجيك دمتم ( ساكس )